-
खुलेआम भोंदूगिरी करणार्या बाबांची यादी अंनिस पोलिसांना देणार.
– राज्याचे पोलीस महासंचालक सदानंद दाते यांना अंनिसचे निवेदन
ज्योतिषी- बाबा-बुवा आणि राजकारणी-सरकारी अधिकारी-धनदांडग्या प्रभावशाली व्यक्ती यांची साठगाठ किती भयानक शोषणकारी असते याचे हादरवून टाकणारे चित्र ज्योतिषी अशोक खरातच्या प्रकरणातून पुन्हा एकदा महाराष्ट्रासमोर आले आहे.
या प्रकरणाचा निष्पक्षपाती तपास होऊन गुन्हेगारांना शासन झालेच पाहिजे तसेच पुन्हा असे प्रकार घडू नयेत यासाठी पुढील मुद्यांची प्रभावी अंमलबजावणी झाली पाहिजे अशी मागणी महाराष्ट्र अंधश्रद्धा निर्मूलन समितीच्या वतीने राज्याचे पोलीस महासंचालक सदानंद दाते यांच्याकडे एका निवेदनाद्वारे करण्यात आली आहे.
भोंदूबाबांची यादी
सामान्य नागरिक व पीडित व्यक्ती या बुवा बाबांकडून होणार्या शोषणासंदर्भात अंनिस कार्यकर्त्यांशी संपर्क साधत असतात. प्रत्येक जिल्ह्यातील अशा प्रमुख शोषणकारी भोंदू बुवाबाबांची यादी व शक्य असेल तेथे यासंदर्भातील पुरावे असलेला पेन ड्राईव्ह अंनिसचे कार्यकर्ते जिल्हा पोलीस अधीक्षकांच्या सुपूर्त करणार आहेत.
अंनिसच्या राज्य कार्यकारी समितीचे सदस्य मुक्ता दाभोलकर, राजीव देशपांडे, गणेश चिंचोले यांनी महाराष्ट्राचे पोलीस महासंचालक श्री. सदानंद दाते यांची भेट घेऊन त्यांना या संदर्भातील निवेदन दिले.
अंधश्रद्धा निर्मूलन कक्षाची स्थापना
प्रत्येक पोलीस स्टेशनमध्ये अंधश्रद्धा निर्मूलन कक्षाची स्थापना करण्याचा शासन निर्णय आहे. हे अंधश्रद्धा निर्मूलन कक्ष प्रत्यक्ष कार्यान्वित करणे आवश्यक आहे. पत्रकार, महिला, अंधश्रद्धा निर्मूलन चळवळीतील कार्यकर्त्यांना सदर अंधश्रद्धा निर्मूलन कक्षाचे सदस्य म्हणून जोडून घेऊन त्यांच्या नियमित बैठका झाल्या तर परिसरात चालणारे अघोरी प्रकार वेळीच समोर येतील व त्यांना पायबंद घालता येईल. त्यासाठी फक्त कागदावर असलेले हे अंधश्रद्धा निर्मूलन कक्ष कार्यान्वित झाले पाहिजे, अशी मागणी या निवेदनामध्ये करण्यात आलेली आहे. मा. पोलीस महासंचालक सदानंद दाते यांच्या भेटीदरम्यान याबद्दलचे निवेदन देखील त्यांना देण्यात आले.
भोंदूबाबांसंदर्भात हेल्पलाईन
भोंदूबाबा, ज्योतिषी यांनी शोषण केलेल्या पीडित व्यक्तींसाठी महाराष्ट्र अंधश्रद्धा निर्मूलन समिती एक हेल्पलाईन सुरू करत आहे. त्याचे मोबाईल क्रमांक पुढीलप्रमाणे. ७५८८८०६६८८, ८०८७८७६८०९
ज्योतिषी, भोंदूबाबा महिलांचे शोषण करत असल्यास हेल्पलाईन क्रमांक ९४२२३०५९२९ यावर संपर्क करावा. याद्वारे प्राप्त झालेल्या तक्रारींचे तथ्य तपासून अंनिस वेळोवेळी त्यांची यादी पोलिसांना देणार आहे.
जादूटोणा विरोधी कायद्याचे नियम तयार करण्याची मागणी
डॉ. नरेंद्र दाभोलकरांच्या बलिदानानंतर २०१३ साली जादूटोणा विरोधी कायदा मंजूर झाला. याला एक तप उलटून गेले तरीही शासनाने या कायद्याचे नियम तयार केलेले नाहीत. जादूटोणा विरोधी कायद्याचे नियम तयार करून सदर कायद्याच्या अंमलबजावणीची प्रक्रिया आणि त्यासंदर्भातील पोलिसांची जबाबदारी शासनाने अधिक सुस्पष्ट केली पाहिजे. लोकांच्या मनात भीती उत्पन्न करून त्यांना अघोरी कृत्ये करायला लावणारे अशोक खरात सारखे ज्योतिषी, बाबा, बुवा, मांत्रिक गावोगावी आहेत. ते अशोक खरात एवढे दांडगे बनण्याची वाट न पाहता वेळीच पोलीस हस्तक्षेप करून त्यांच्या प्रभावाला पायबंद घालण्यासाठी या कायद्याचे नियम तयार झालेच पाहिजेत. सदर नियमांचा प्रस्तावित मसुदा महाराष्ट्र अंनिसने याआधी शासनाला सादर केलेला होता, परंतु लवकरच पुन्हा एकदा अंनिसच्या वतीने या नियमांचा मसुदा सामाजिक न्याय विभागाला सादर करण्यात येईल.