भरत यादव - 9890140500
घरंदाज बायका,
बांगड्यांच्या किनकिनाटात
आपल्या उदासीनतेचा
कोलाहल लपवत झाकून घेत असतात
आपली रंगविहीन दुनिया
लालचुटूक रंगाच्या दरवाजांमधून,
निर्बंधांच्या अदृश्य बेड्यांना पैंजणांचे घुंगरू बनवून
अंबाड्यात आवळून बांधतात त्या,
स्वातंत्र्याची क्रांती घडवू पाहणार्या इच्छांना.
मोळा माथ्यावर मिरवत हसत असतात
त्या अस्फुट हसू
स्वतःची भूक संकोचाच्या कोनाड्यात ठेवत,
भरवत असतात त्या सर्वांना गरमागरम अन्न,
चांदरातीच्या तिसर्या प्रहरापर्यंत
अर्धवट उघड्या डोळ्यांनी करतात
त्या प्रतीक्षा
पतीच्या परतण्याची.
मग..
एक दिवस ती घरंदाज बाई
झटक्यात मोकळा करते अंबाडा
आणि लेकीच्या कुरळ्या केसांमध्ये
टाकते खोचून सगळ्या क्रांतिकारी इच्छांना,
स्वतःच्या अस्फुट हास्याला पेरून टाकते
ती लेकीच्या ओठांवरती हास्यस्फोटाच्या रुपात,
अर्धअंधार्या घरात ती
लेकीसाठी बनवते एक खिडकी
मोकळ्या आकाशाच्या दिशेने डोकावणारी.
घरंदाज बायकांच्या
दबल्या-चिरडल्या इच्छांचेच
होत असते भरणपोषण
समाजातील सरंजामी विचारांना
आपल्या टाचेखाली चिरडत
मुक्तपणे जगत असतात
स्पष्टवक्त्या लेकी
मूळ हिंदी कविता : हेमंत परिहार
मराठी अनुवाद : भरत यादव
yadavbh515@gmail.com
संपर्क : 9890140500