होळीची पोळी वाटपाचा उपक्रम उत्साहात संपन्न

चाकण येथे होळीची पोळी दान

चाकण शाखा– महाराष्ट्र अंधश्रद्धा निर्मूलन समिती, कलाविष्कार मंच, स्व. गुलाबराव गोरे प्रतिष्ठान, वसुंधरा बहुउद्देशीय संस्था यांच्या वतीने दरवर्षी प्रमाणे याही वर्षी ‘होळी करा लहान पोळी करा दान’ हा उपक्रम चाकण येथील कातकर वस्ती, शेल पिंपळगाव येथील अनाथाश्रमात राबविला. समितीचे हे १४ वे वर्ष आहे.

या वेळी अंनिस समितीच्या कार्याध्यक्षा प्रमिला गोरे मॅडम, कलाविष्कार मंचचे अध्यक्ष विशाल बारवकर, जिल्ह्याचे संघटक नारायण करपे सर, शामभाऊ राक्षे, विजयकुमार तांबे, अनिल टोपे, मधुसूदन शेवकरी, अनुष्का करपे, देविका महाजन, माधव शेवकरी, सचिन आल्हाट उपस्थित होते. तसेच चक्रेश्वर देवस्थानचे विश्वस्त लक्ष्मण बापू वाघ, रमा हुलावळे व चाकण ग्रामस्थांचे विशेष सहकार्य लाभले.

‘होळीची पोळी दान करा’ कार्यक्रम ठाणे येथे उत्साहात साजरा

महाराष्ट्र अंधश्रद्धा निर्मूलन समिती, ठाणे शहर शाखेतर्फे वंदना शिंदे (जिल्हाध्यक्ष) यांच्या मार्गदर्शनात ‘होळीची पोळी लहान करा पोळी दान करा’ कार्यक्रमाचे नियोजन केले गेले. दिनांक ६ मार्च २०२३ रोजी सायंकाळी होळीनिमित्त पोळी संकलनाचे काम नेहमीप्रमाणे अंनिस कार्यकर्ते, वंदना शिंदे, पुष्पाताई तापोळे आणि अजित डफळे यांनी ठाणे पश्चिम येथील वसंत विहार को-ऑप सोसायटीमधून केले. पोळ्या बनवून छान पाकिटात घालून सुपूर्द करत सर्व रहिवाशांनी उत्साहाने या उपक्रमात सहभाग घेतला.

यानंतरचा टप्पा होता, संकलित केलेल्या पोषक चविष्ट पोळ्यांचे लगोलग वितरण. त्याची जबाबदारी अंनिस सदस्य अँब्रोस चेट्टियारने स्वीकारली होती. माई आणि अजित पोळ्या घेऊन वाघबीळ नाका, घोडबंदर रोड येथे पोहोचले. तेथून अँब्रोसचे मित्र दीपक भालेराव तसेच कन्हैया पाटील यांच्या मदतीने जुने वाघबीळ गाव येथील वस्तीमध्ये पोळ्या वितरणाचे ठरले होते त्याबरहुकूम काम झाले. कन्हैया पाटील व त्यांचे मित्र कृष्णा सूर्यवंशी व तेथील ज्येष्ठ सामाजिक कार्यकर्ते डॉ. भोसले यांच्या साहाय्याने रहिवाशांना पोळी वितरणाचा कार्यक्रम आखला गेला होता. होळीच्या पोळीची गोड भेट माईं, अँब्रोस आणि अजित यांनी शुभेच्छांसह घरोघरी जाऊन वाटली. रहिवासी आनंदाने उत्साहाने प्रतिसाद देत होते. लहानथोर सर्वांच्याच मनात त्यांच्या भोसले, डॉक्टर कन्हैया पाटील, कार्यकर्ते यांच्याबद्दल आदर दिसून येत होता. सदर वस्तीतील लोकांना पिण्याचे पाणी, वीज इ. सर्व सुविधा पुरविण्यात कन्हैया पाटील, डॉ. भोसले यांचा पुढाकार आहे. अशा प्रकारे दोन सामाजिक कार्य करणारे गट एकत्र सेवा प्रदान करतानाचे दुर्मीळ चित्र दिसले.

–अँब्रोस चेट्टियार, म. अंनिस ठाणे शहर.